Cultura e civilizacion occitanas 1

Aqueste obratge qu’a per amira de hicar a disposicion deus ensenhaires d’occitan de l’ensenhament segondari los supòrts necessaris entà integrar elements de cultura e civilizacion occitanas a las sequéncias de cors. Qu’ei concebut entà estar emplegat autanplan dab grops de començants en iniciacion com dab grops d’aprenents mei avançats, de seccion bilingua, de licèu o enlà. Que segueish ua progression tematica ligada au Quadre europèu comun de referéncia tà las lengas.
Aqueste purmèr tòme que tracta dus aspèctes culturaus : l’identitat dab dotze figuras d’Occitania e lo lòc de demorança dab onze vilas occitanas d’interès.
Que s’ageish d’ua causida qui a per objècte d’estar completada en tòmes ulteriors.

Los tèmas pressentits tà la seguida que son :
– l’environament immediat : de casa a l’escòla ;
– lo viatge : visitas e lòcs istorics ;
– la cosina ;
– las granas hèstas de l’annada ;
– los jòcs e los espòrts ;
– los escrivans occitans.

En cada document que caben illustracions, un petit enquadrat sus hons gris on se tròba un tèxte de presentacion hòrt simple au present, e un tèxte au passat mei desvolopat e detalhat mes a portada d’ua classa de fin de cicle 4 o de licèu. Lo petit tèxte de presentacion que pòt estar emplegat com amòrsa o com supòrt principau en classas d’iniciacion o de començants. 
Que i a suu digipad d'acompanhament pedagogic e de perlongament, las illustracions – qui son projectaderas en classa entà aviar la paraula dens lo grop –, ligams exteriors suu subjècte, documents audios o videos, tèxtes, ideas d’espleitacions pedagogicas, etc. Qu’auratz tanben la possibilitat de telecargar los enregistraments deus tèxtes, çò qui pòt estar lo parat d’aviar lo tèma per la comprenença de l’orau.
Que’s tròba ací : https://digipad.app/p/1507205/e6de853ba9d34

L’obratge qu’ei mutidialectau. Cada subjècte qu’ei tractat dens lo dialècte d’origina : Gaston Febus en gascon, Tolosa en lengadocian, Marselha en provençau, etc. Qu’ei lo parat de tribalhar sus l’interdialectalitat en collègi e licèu.